Hindi alam ni Anu kung ano ang magiging reaksiyon nila.
7 taong gulang siya at kararating lang niya sa paaralan niya sa Birmingham, England, suot ang isang kulay-rosas na prosthesis para sa sports. Nawala ang kanang binti niya di-nagtagal matapos siyang ipanganak, at nang araw na iyon, unang makikita ng mga kaklase niya ang bago niyang “binti”.
Hindi talaga naging alanganin ang naging reaksiyon nila. Purong pagkamausisa iyon. “Iyan ba ang bago mong pink na binti?” tanong ng isa sa mga kaklase niya habang lumalapit ang iba para mas makita iyon. May ilan na napabulalas ng “wow”. Niyakap siya ng dalawa sa mga kaibigan niya. Di-nagtagal, tumakbo si Anu palayo habang magkahawak-kamay sila ng isa sa mga ito, gaya ng ibang batang babae tuwing recess.
Ipinagkaloob ang prosthesis dahil sa pondong 1,5 milyong pound para sa NHS, ang serbisyong pangkalusugan ng Britanya, na naglaan ng mga mapagkukunan para mabigyan ng mga prosthesis para sa sports ang mga batang naputulan ng paa. Ikinuwento ito ng BBC Midlands, at kinuha naman ito ng Business Insider noong Mayo 2017. Sa huli, may ipinakita ang mga larawan na mas simple kaysa sa isang prosthesis: isang masayang batang babae, napalilibutan ng mga kaibigan niya.