Nabawi ni Francisca Amaral, isang 40 taong gulang na ina, ang kakayahang gamitin ang kamay niya dahil sa isang pambihirang operasyon: pinalitan ng mga doktor ng isa sa mga daliri sa paa niya ang hinlalaki niyang nawala sa isang aksidente sa trabaho.
Mahigit isang dekada nang nagtatrabaho sa Queensland, Australia, ang babae, na isang imigrante mula sa Silangang Timor, nang maipit ang kamay niya sa conveyor belt ng isang pabrika noong Enero. Pagkalipas ng walong buwan, nagsagawa ang isang siruhano ng 12-oras na operasyon at pinagdugtong ang mga buto, litid, arterya, at mga daluyan ng dugo na wala pang isang milimetro ang lapad upang mailipat ang ikalawang daliri sa paa niya papunta sa kamay niya.
At mas maagang nagpakita ng mga resulta kaysa inaasahan! Wala pang 24 na oras, nagawa na niyang igalaw ang bago niyang hinlalaki, at makalipas ang ilang linggo, halos ganap na niyang nabawi ang pakiramdam dito. Kaya na niyang humawak ng mga bagay, magsulat, at magsagawa ng mga eksaktong galaw habang ipinagpapatuloy ang rehabilitasyon niya. Habang lumuluha, sinabi niya, “Masaya ako dahil nagagamit ko na ang hinlalaki ko”.
