Hindi nagdalawang-isip si Xuan Fengying.
17 taon na ang nakalipas, nabangga ng trak ang kanyang manugang na si Xu sa isang nayon sa Qingyun County, sa lalawigan ng Shandong sa China. Isang buwan pa lamang ang nakalipas mula nang ikasal ito. Naiwan si Xu sa vegetative state, at nagpasiya si Xuan, na 68 na ngayon, na siya ang mag-aalaga rito.
Nakakapagod ang kanyang pang-araw-araw na gawain. Pinapakain niya si Xu ng likidong pagkain, tig-iisang kutsara, at inaabot ng isang oras ang bawat kainan. Binabaligtad niya ito nang mahigit sampung beses kada araw upang maiwasan ang mga sugat dahil sa matagal na pagkakahiga, nililinis ito, minamasahe ang mga kalamnan nito, at pinatutugtog ang mga paborito nitong kanta. Ikinukuwento niya rito ang pinakabagong balita tungkol sa pamilya at paulit-ulit na binabanggit ang pangalan nito, sakaling tumugon ito balang araw.
Ilang taon na ang nakalipas, tumugon si Xu. Nagkamalay siya mula sa vegetative state, at tinulungan siya ni Xuan na matutong maglakad at gawin ang mga ehersisyo para sa rehabilitasyon. Ngayon, nakapagsasabi na siya ng ilang salita at nakapagluluto ng mga simpleng pagkain, bagaman dahil sa pinsala sa utak, taglay niya ang mga kakayahan ng isang batang 4 na taong gulang. Sa isang video, tumingin siya sa kanyang biyenan at nagsabi: “Nay, napakaganda niyan”.
“Nagpakasal siya sa anak kong lalaki, kaya anak ko na rin siya. Paano ko siya pababayaan?” Ayon umano sa sinabi ni Xuan. Ayon sa lokal na media, ang pinakanagbibigay-kapanatagan sa kanya ay alam na ngayon ni Xu kung paano magluto: sa gayon, may makakain ito sa araw na wala na si Xuan.