2 taong gulang na si Jaren Gamongan at nakatira siya sa Apayao, isang bulubunduking rehiyon sa Pilipinas.
Isinilang siya na may makapal na buhok, maiitim na bigote sa magkabilang gilid ng mukha, at mga kumpol ng buhok sa mukha, leeg, likod, at mga braso.
Kumbinsido ang kanyang ina na si Alma na siya ang may kasalanan. Habang nagdadalantao, hindi niya mapigilan ang pananabik sa karne ng mailap na pusa, isang eksotikong putahe sa lugar na tinitirhan nila.
Ayon sa salaysay niya, naghanap siya ng isang itim na pusa kasama ang mga kaibigan mula sa nayon at kinain niya ito matapos igisa kasama ng mga halamang-gamot. Nang isilang si Jaren, pinagsisihan niya ito. Pinalakas din ng mga kapitbahay ang paniwalang sumpa iyon.
Hindi nasiyahan si Alma sa paliwanag na iyon: dinala niya ang kanyang anak sa mga kuwalipikadong doktor.
Ang diagnosis ay hypertrichosis, isang kondisyong sinasabing nakaaapekto sa isa sa bawat isang bilyong tao, at 50 hanggang 100 kaso lamang ang naiulat mula pa noong Gitnang Panahon.
At ang sagot na pinakamahalaga sa kanya: ayon sa mga midyang nag-ulat tungkol sa kanyang kuwento, sinabi sa kanya na walang kinalaman dito ang kinain niya.
Sa ngayon, wala pang lunas, ngunit masayahin at palabiro si Jaren, ang gitnang anak sa tatlong magkakapatid. Ang tanging ikinatatakot ng kanyang ina ay ang araw na kailangan na niyang pumasok sa paaralan.