Pinangarap ni Kaelyn Goodman na maging prinsesang anghel para sa Halloween. Pero may problemang alam na alam na niya sa edad na 9: ang kanyang silyang de gulong.
Nakatira si Kaelyn sa Florida at may congenital myasthenic syndrome, isang pambihirang namamanang sakit na nakaaapekto sa mga ugat at kalamnan. Nagbibigay sa kanya ng kalayaan ang kanyang silyang de gulong kapag napapagod ang kanyang mga kalamnan, pero sa pagkakataong ito, nag-alala siyang magiging sagabal ito sa kanyang kasuotan. Pagkatapos, hinarap ng 25 mag-aaral sa ikawalong baitang sa paaralan niya ang hamon bilang proyekto para sa klase nila sa STEM; nakilala sila kalaunan bilang “Kaelyn’s Angels”.
Hindi nila basta inakala kung ano ang gusto niya. Inanyayahan nila siyang pumunta sa silid-aralan nila, pinakinggan ang mga ideya niya, at tinanong tungkol sa mga paborito niyang kulay. Hindi na sumama si Kaelyn sa recess niya para umupo kasama nila at magdisenyo at magpasya. May ilang bagay na hindi umubra at kinailangang gawin muli, at natutong manahi ang ilan sa kanila kahit hindi pa nila alam kung paano magpasok ng sinulid sa karayom.
Noong October 10, sa Trunk-or-Treat event ng paaralan niya, naging trono ng anghel na may mga pakpak ang silyang de gulong. “Pakiramdam ko, isa talaga akong prinsesa”, sabi ni Kaelyn sa PEOPLE magazine. Ganito ito ibinuod ng mga magulang niya: ginawa nilang maganda ang isang bagay na karaniwang itinuturing na kagamitang medikal.