Nagkaroon ng sugat si Tina Earls sa loob ng butas ng ilong niya noong 2012, pero hindi niya ito gaanong inisip.
Kapag ikinikiling niya ang ulo niya, tumutulo ang likido, at namamanhid ang kaliwang bahagi ng mukha niya. Tiniis niya ang pangangati at ang bukol sa loob ng halos dalawang taon, hanggang sa masuri siyang may kanser sa ilong na nasa ikalawang yugto noong Mayo 2014. Nang marinig niya ang balita, nalaglag ang telepono mula sa mga kamay niya. Inalok siya ng radiotherapy, pero may babala: maaari siyang mabulag dahil dito, at kakailanganin niyang pakainin sa pamamagitan ng tubo sa buong buhay niya. Iba ang pinili ni Tina: ipatanggal ang buong ilong niya. Nag-alinlangan ang doktor na permanenteng sirain ang hitsura niya, pero sigurado siya: “Ano’ng saysay ng pagiging maganda kung patay naman ako?”.
Sa loob ng anim na buwan, nagkaroon siya ng prosthesis para takpan ang malaking tatsulok na iniwan sa mukha niya. Pero inirita ng pandikit ang balat niya, at matapos ang dalawang taon ng paghihirap, tumigil na siyang magsuot nito. Ngayon, lumalabas siya nang nakalantad ang butas. Kapag matagal siyang tinititigan ng isang tao, tinititigan niya rin ito at ngumingiti. “Wala nang mas maganda pa kaysa sa pagiging buhay,” sabi niya.
