Una, sinukat ang kanilang taas. Pagkatapos, depende sa dami ng tabletang dapat nilang matanggap, may ilan na binigyan ng tatlo, ang iba ay dalawa, at ang iba naman ay isa lang.
Layunin nitong tulungan silang manatiling malusog sa pamamagitan ng kampanya para sa pag-iwas at paggamot sa bilharzia sa Government Science Secondary School sa Batagarawa, sa Estado ng Katsina, hilagang Nigeria. Gayunman, ilang sandali matapos matanggap ang gamot, nagsimulang makaramdam ng sakit ang hindi bababa sa 64 na estudyante: nagsuka sila, sumakit ang tiyan at nahilo.
Dinala agad ang mga estudyante sa Ahmadi Rimi General Hospital at Turai Yar’Adua Mother and Child Hospital sa Katsina. May ilan na dumating nang walang malay, ayon kay Auwal Sani, ang direktor medikal ng unang nabanggit na ospital.
Praziquantel ang gamot na ibinigay, na karaniwang ipinamamahagi nang maramihan bilang hakbang sa pag-iwas sa mga rehiyong laganap ang impeksiyon ng bilharzia.
Ayon sa pulisya ng Katsina, mahigit 700 estudyante ang tumanggap ng paggamot sa dalawang sesyon. Binigyan ng gamot ang unang grupo noong Biyernes, Oktubre 24, at walang naiulat na komplikasyon. Samantala, nagsimulang makaranas ng mga sintomas ang mga estudyanteng ginamot noong sumunod na Lunes.
Ayon sa imbestigasyon, marami raw sa mga estudyante ang nakatanggap ng mga tableta nang walang laman ang tiyan, bandang 11:00 ng umaga. Sinabi ng mga magulang at estudyanteng kinapanayam na hindi rin sila binigyan ng pagkain bago o pagkatapos uminom ng gamot.
Gayunman, nagpahayag ng posibilidad na nasobrahan ang dosis ng dalawang doktor na nakipag-usap sa pahayagan nang hindi inilalantad ang kanilang mga pangalan. Inilarawan ng isa sa kanila kung paanong nakaranas ng napakatinding sakit ang ilang estudyante kaya pumipilipit sila sa sahig. Gayunman, hindi pa ito kinukumpirma ng mga awtoridad at, kung totoo, magiging seryosong paratang ito dahil mga bata ang sangkot.
Samantala, tiniyak ng Komisyoner sa Edukasyon na si Yusuf Sulaiman Jibia sa publiko na ganap nang gumaling ang lahat ng estudyanteng naapektuhan at inihahanda na ang kanilang pagbabalik sa klase. Nangako rin siyang sisiyasatin kung ano ang naging problema.