Nakasuot si Jorlan Alves da Silva ng itim na peluka, damit na may guhit, sandalyas, at pinintahang mga kuko nang harangin siya ng mga pulis sa Mulungu, Paraíba, noong Linggo, Setyembre 13. Karga niya ang isang dalawang-taóng-gulang na bata na hindi niya anak. Ang nagbunyag sa kanya ay isang maliit na kapabayaan: umangat ang damit at lumitaw ang isang tattoo na dati nang nakilala ng mga opisyal.
Tumagal nang 48 oras ang operasyon at isinagawa ito matapos mabigo ang isang pagtatangkang hulihin siya dalawampung araw na ang nakalipas. Matapos maaresto, ipinagtapat ng 33-taóng-gulang na si Da Silva sa mga pulis na nakagawa siya ng 80 pagpatay sa loob ng 20 taon, kabilang ang pagpatay sa sarili niyang ama noong 13 taong gulang pa lamang siya. Sa ngayon, 16 na pagpatay lamang na naganap sa nakalipas na tatlong buwan ang tiyak na naiugnay ng mga imbestigador sa kanya, at dahil sa mga itinuro niya, natagpuan na nila ang hindi bababa sa isang nakabaong bangkay.
Kung makumpirma ang bilang na 80 biktima, malalampasan niya si Pedro Rodrigues Filho, ang “Brazilian Dexter,” at magiging pinakamaraming pinaslang na serial killer sa kasaysayan ng Brazil. Sinuri ng mga doktor ang batang karga niya at wala itong pinsala. Hindi pa malinaw ang ugnayan niya kay Da Silva.
