Sa loob ng maraming taon, sina Oren, Alon, at Tal Alexander ay mga ahente ng mamahaling real estate na nagbebenta ng mga mansiyon sa New York at Miami. Noong Martes, hinatulan ng pederal na korte sa Manhattan ang bawat isa sa kanila ng 30 taon sa bilangguan dahil sa pagdodroga at panggagahasa sa mga babae bilang bahagi ng isang network ng sex trafficking.
Humingi ang mga tagausig ng mga sentensiyang habambuhay na pagkakakulong. Inilarawan sila ni Hukom Valerie Caproni bilang sina Dr. Jekyll at Mr. Hyde: mga lalaking nagmamahal sa kanilang mga anak at, kasabay nito, mga “sadistikong seksuwal na mandaragit na mapoot sa kababaihan.” Sinabi niyang “kakila-kilabot,” ang kanilang ginawa, ngunit hindi niya sila itinuring na wala nang pag-asang magbago, kaya tinanggihan niya ang mga sentensiyang habambuhay na pagkakakulong. Ayon sa Telemundo 51, ginamit nila ang kanilang yaman at akses sa mga mamahaling ari-arian para salakayin ang dose-dosenang babae.
Binasa sa pagdinig ang mga pahayag mula sa 11 biktima. Ganito ang sinabi ni Maya Miller tungkol sa panggagahasa sa kanya ni Tal Alexander: “May dala akong tahimik na libing sa loob ko.” Ayon sa AP, marami sa mga babaeng naroon ang tila nadismaya, dahil nangangahulugan ang mga sentensiya na makalalabas sa bilangguan ang magkakapatid sa edad na malapit na sa pagreretiro. Ipinahayag ng depensa, na iginigiit na inosente ang tatlo, na iaapela nila ang hatol.
