Ipinahiga pa lang ni Sydney Moore ang kanyang dalawang anak para umidlip nang walang babalang tumama ang buhawi.
Disyembre 9, 2023 noon, sa Clarksville, Tennessee. Natutulog si Lord, 4 na buwan, sa kuna niya malapit sa harapang bahagi ng mobile home. Nagpapahinga naman si Princeton, 1 taong gulang, sa likurang kuwarto.
Sa loob lamang ng ilang segundo, lumipad ang bubong at tinangay nito ang kuna, habang nakakapit dito ang ama ng mga bata na si Aramis Youngblood. Nagpatihulog si Sydney sa ibabaw ni Princeton nang gumuho ang mga dingding.
Inangat sila ng hangin at dalawang beses silang ibinagsak sa lupa, pero hindi kailanman naalis sa mga bisig niya ang bata.
Nang matapos ang lahat, naririnig nina Sydney at Aramis ang isa’t isa, pero hindi nila makita ang isa’t isa. Nakulong sa gitna ng mga labi, nagawa niyang palayain ang sarili at si Princeton. Sugatan, lumabas siya sa ulan para hanapin si Lord.
Ganito ikinuwento ni Sydney ang nangyari: “halos nakatitiyak” siyang namatay na ang kanyang anak.
Hanggang sa matapos ang halos 10 walang-katapusang minuto, natagpuan siya ni Aramis. Buháy si Lord, mga 7 metro ang layo, sa isang guwang sa paanan ng natumbang puno.
Nawala ang bahay at lahat ng kanilang ari-arian, pero nakaligtas silang apat, na puro gasgas at pasa lamang, maliban sa isang collarbone na naalis sa puwesto.