Hindi karaniwang sumasama si Cristina Basualdo sa anak niyang lalaki papunta sa trabaho. Pero noong Sabado na iyon, sumama siya.
Nagkaroon ng brownout at pagkawala ng tubig sa Ayacucho, Argentina, kaya mas huli kaysa karaniwan nagbukas ang tindahang pampamilya. Pagdating niya, nakita niyang nakababa ang shutter at inisip na may nag-iwan ng bintanang hindi nakasara nang maayos. Pagkatapos, may nakita ang anak niya na mas malala: isang lalaking kalahati ng katawan ay nasa labas ng bintana habang sinusubukang tumakas. Nagawa niyang hawakan ang mga paa ng lalaki, pero nakawala rin ang magnanakaw.
Hinabol siya ni Cristina, isang 48-taóng-gulang na nars at guro ng karate-do. Naabutan niya ito, ibinagsak sa lupa, at ikinontrol sa pamamagitan ng isang hawak. May kapitbahay na nagrekord ng lahat.
Mula sa lupa, sumigaw ang lalaki sa kaniya: “Bitawan mo ako o babarilin kita!”. Pagkatapos, wala nang pagbabanta: “Bitawan mo ako, Cristina!”. Kilala na niya ito mula pa noong bata ito. “Mahirap ang naging buhay niya at lumaki siya sa mga group home, pero hindi ibig sabihin niyon na puwede kang basta na lang magnakaw”, sabi niya. Sigurado siyang walang armas ang lalaki at hindi niya ito binitawan hanggang sa dumating ang mga pulis.
Hindi naman itinuturing ni Cristina na malaking bagay ang nagawa niya: “Hindi maayos ang pagkakagawa sa hawak at hindi ito naka-lock, pero ang layunin ay pigilan siya”. Nangyari ang insidente noong Nobyembre 2023, at patuloy pa ring kumakalat ang video.